Ninna nanna de Anton’Istene – Malos bisos e tancas fioridas est unu cortometrazu animau naschiu dae sa collabborassione de su Coro ’e Nùgoro chin Paolo Fresu e chin Manuelle Mureddu, chi nd’hat curau sa regia e nd’hat fattu sos disegnos. Su Coro ’e Nùgoro, accumpanzau dae Paùlu Fresu a sa trumba, cantat sa ninna nanna musicada in su 1975 dae Gian Paolo Mele.

Ind’una notte trista de trìgulas de su 1975 a Gian Paolo li morit su fizicheddu, unu creaturedda de pacos meses. Dae cussu dolore, dae cussu dolu, dae cussa pena naschit s’idea de Gian Paolo de musicare e armonizare una ninna nanna, sa Ninna nanna de Anton’Istene, iscritta dae su poeta mannu desulesu Antiocu Casula cando, in sos primos annos Trinta, haend’hàppiu su matessi dolore de pèrdere unu fizu, haiat postu in poesia tuttu sas isperànzias, tottu sos isettos suos pro un’àtteru fizu impessu naschiu.

Sa Ninna nanna de su Coro ’e Nùgoro in su 1977, hat hàppiu abberu unu suzzessu mannu. Medas artistas, e tra isssos Gian Maria Testa, Marisa Sannia e Pàulu Fresu, l’han cantada e sonada.

Un’annu a pustis de s’ùrtimu saludu a Gian Paolo, su fizu Francesco e su Coro han pediu a Paùlu Fresu de bi torrare a sa Ninna nanna, e issu l’hat fattu chind’una interpretassione ispantosa, ube sa trumba sua abbrazzat sa boche ’e sos cantores. Manuelle Mureddu, famau disegnadore nugoresu, fachet naschire dae sa mùsica immàzines dilicadas e toccantes: b’essit unu corto animau de rara bellesa.

Su Coro de su 1977 e su de su 2018 si dan su càmbiu.
Gian Paolo pesat sa boche. Su fizu Francesco, 41 annos a pustis, li rispondet.