Coro di Nuoro

Sa bidda

In su 1952 Nùgoro est una bidda chi est cambiande e creschende in presse. Sa sicunda gherra mondiale ch’est finia dae pacos annos, sa zente est cuminzande a che pesare sos renes dae terra, in tottube, ube b’haiat dommos bezzas, b’hat cantieris e fràvicos nobos, palattos e dommos; bichinaos nobos naschin ube innantis b’haiat ortos, binzas e pasturas; zente noba b’accudit dae sas biddas de fùrriu e de largu. In Nùgoro, in cuddos annos, duttores e massajos, abbocaos e pastores addobian in sos iscopiles. Sa zente est animosa.

Nùgoro est giai jutta a fama pro more de su prèmiu Nobel pro sa litteradura bintu dae Gràssia ’e Ledda in su 1926 e Il giorno del giudizio, romanzu de sos prus importantes de su Nobichentos, Serbadore Satta est galu a l’iscrìvere.

0:00 -:--

Adios Nùgoro amada

Sa mùsica

In Nùgoro, dae sa sicunda midade ’e s’Ottichentos sun documentadas formas de cantu. In sos annos Trinta ’e su Nobichentos naschit su Corpo Musicale Filarmonico: bi cantan òmines e fèminas e los dirizit su mastru Zoseppe Rachel (autore de sa mùsica de A diosa o Non potho reposare).

“Sos annos a pustis de sa sicunda gherra mondiale, est in sas sacristias chi addòbian sos chi lis aggradit su buon canto, est in ibe chi provan a pònnere paris sos cantos sacros e s’armonia antica de su cantu a tenore”.

Custas paràgulas las podimus lèghere in su libbru Coro di Nuoro e dintorni.
Sas crèsias e sas sacristias, duncas, a cuddos zòbanos lis haian imparau un’àttera manera de cantare chi commo issos cherian usare pro torrare a bocare a pizu sos cantos anticos de Nùgoro chi si che fin irmenticande.

“Sos zòbanos nos abbizabamus chi che fimus perdende cosas importantes abberu, ca sos mannos non bi nollas haian imparadas nen b’haiat iscrittu perunu chi las esseret collias”.
Antonello Mele

0:00 -:--

Non mi giamedas Maria

S’incuminzu

Sos primos locos de addòbiu ’e custu coro naschinde sun istadas sas dommos de sos coristas e sos iscopiles a fùrriu ’e su Cursu.
In su libbru Coro di Nuoro e dintorni leghimus chi:

“Est cantande in foras de crèsia chi provabamus a bìere si fachiat a pònnere paris su cantu artu e su cantu profanu de sa tradissione”.

Sos cantos de sa tradissione fin su tenore, su cantu a chitarra, su ’e sas croffarias, sos cantos a sa labadòrja e sos attittos.

Est Mario Ganga chi in su 1952 collit a pare unos cantos zòbanos chi cuminzan a cantare paris, formande su primu coro de ispirassione populare in Sardinna, est gràssias a issu chi naschit su primu coro de sa chi òje li nan “s’iscola nugoresa”: Su Coro ’e Nùgoro.

A sa prima, Mario Ganga muttit Banneddu Rùju a dirìzere su Coro e issu traballat a sas primas armonizassiones de cantos profanos. Giai in su 1953, su Coro binchet su primu prèmiu in sa Cavalcada Sarda, in Tàttari, ma belle ’e derettu su mastru e su Coro iscropan.

In su 1954-55, su Coro, coordinau dae Umberto Pintori, picat parte a sa trasmissione radiofònica e televisiva Il campanile d’oro, unu cuncursu musicale tra regiones italianas, e bocat fama. Bi pican parte finzas su Coro de Aggius, frades Medas e unu quartetto nugoresu (unu sonadore de armònica, unu de trunfa, unu de chitarra e unu de foza d’èdera).

Sos annos iffattu, unos cantos coristas andan a foras pro istùdiu o pro traballu. Est gràssias a su corista, poeta e iscrittore Romano Rùiu chi, tra sa fine ’e sos annos Chimbanta e sos primos Sessanta, b’arribbat cantores nobos. Tra issos, Peppànzelu Deiana, cantadore balente: gràssias a issu, in intro ’e su Coro si format finzas unu tenore.

0:00 -:--

Tzia Tatana Faragone

Sa tratta e s’eredidade

In su 1963, su Coro fachet direttore Gian Paolo Mele, chi, in 55 annos, chin sos istùdios e sas armonizassiones suas, semper bene arradichinadas a sos sonos de sa tradissione sarda, s’hat balanzau su tìtulu de Maestro del Folklore in su 1981 e de Padre del folklore in su 2016.
Sos chi benin a pustis de su 1963 sun annos de cunzertos, biazos e rezistrassione ’e discos.

In sos annos Sessanta medas coristas ballaban in su gruppu tradissionale de s’ente dopolavoro ENAL. Dae cuddu gruppu, in su 1970 naschit su gruppu de ballu ’e su Coro ’e Nùgoro, chi dae tando, pro annos e annos, hat a zirare su mundu paris chin su coro e chin su tenore.

In bell’e settant’annos su Coro hat picau parte a sos mezus addòbios de cultura e mùsica populare in Itàlia, Franza, Ispagna, Isvìzzera, Bèlgio, Olanda, Germània, Galles, Isvèzia, Egitto, Istaos Unios e Cànada, e in tottube hat juttu amistade e amore a sa mùsica.

In su mese ’e frevàrju de su 2018 Gian Paolo Mele est mancau. Sa tratta chi hat lassau in 55 annos de diressione est una prenda, un’eredidade manna pro su fizu Francesco (direttore nobu ’e su Coro) e pro tottus sos coristas. S’impinnu e sa punna issoro est a collire e a mandare a dainnantis s’amore suo pro sa mùsica sarda e su rispettu pro sas radichinas populares, tradissionales de su cantu.

Sun sas radichinas profundas, s’amore a Nùgoro e a sa Sardinna intrega sos chi han fattu crèschere e han mantesu uniu su Coro settant’annos. Est dae custos ingredientes chi naschit sa mùsica, chi naschin sas armonias, comente su mustu ei su binu bonu b’essin pezzi si est bona s’àchina, e s’àchina est bona si su binzaresu contipizat sa binza chin amore.

0:00 -:--

Su castanzeri